ปฐม ปาราชิก สิกฺขาปุจฺฉา

ปุจฺฉา – ยํ เตน อาวุโส ภควตา ชานตา ปสฺสตา อรหตา สมฺมาสมฺพุทฺเธน ปฐมํ ปาราชิกํ กตฺถ ปญฺญตฺตํฯ

วิสฺสชฺชนา – เวสาลิยํ ภนฺเต ปญฺญตฺตํฯ

ปุจฺฉา – กํ อาวุโส อารพฺภ ปญฺญตฺตํฯ

วิสฺสชฺชนา – สุทินฺนํ ภนฺเต กลนฺทปุตฺตํ อารพฺภ ปญฺญตฺตํฯ

ปุจฺฉา – กิสฺมิํ อาวุโส วตฺถุสฺมิํ ปญฺญตฺตํฯ

วิสฺสชฺชนา – สุทินฺโท ภนฺเต กลนฺทปุตฺโต ปุราณทุติยิกาย เมถุนํ ธมฺมํ ปฏิเสวิ, ตสฺมิํ ภนฺเต วตฺถุสฺมิํ ปญฺญตฺตํฯ

ปุจฺฉา – อตฺถิ อาวุโส ตตฺถ ปญฺญตฺติ อนุปญฺญตฺติ อนุปฺปนฺนปญฺญตฺติฯ

วิสฺสชฺชนา – เอกา ภนฺเต ปญฺญตฺติ ทฺเว อนุปญฺญตฺติโย, อนุปฺปนฺนปญฺญตฺติ ตสฺมิํ นตฺถิฯ

ปุจฺฉา – สพฺพตฺถปญฺญตฺตินุโข อาวุโส ปเทสปญฺญตฺตินุโขฯ

วิสฺสชฺชนา – สพฺพตฺถปญฺญตฺติ ภนฺเตฯ

ปุจฺฉา – สาธารณปญฺญตฺตินุโข อาวุโส อสาธารณปญฺญตฺตินุโขฯ

วิสฺสชฺชนา – สาธารณปญฺญตฺติ ภนฺเตฯ

ปุจฺฉา – เอกโตปญฺญตฺตินุโข อาวุโส อุภโตปญฺญตฺตินุโขฯ

วิสฺสชฺชนา – อุภโตปญฺญตฺติ ภนฺเตฯ

ปุจฺฉา – ปญฺจนฺนํ อาวุโส ปาติโมกฺขุทฺเทสานํ กตฺโถคธํ กตฺถ ปริยาปนฺนํฯ

วิสฺสชฺชนา – นิทาโนคธํ ภนฺเต นิทานปริยาปนฺนํฯ

ปุจฺฉา – กตเมน อาวุโส อุทฺเทเสน อุทฺเทสํ อาคจฺฉติฯ

วิสฺสชฺชนา – ทุติเยน ภนฺเต อุทฺเทเสน อุทฺเทสํ อาคจฺฉติฯ

ปุจฺฉา – จตุนฺนํ อาวุโส วิปตฺตีนํ กตมา วิปตฺติฯ

วิสฺสชฺชนา – สีลวิปตฺติ ภนฺเตฯ

ปุจฺฉา – กา อาวุโส วิปตฺติฯ

วิสฺสชฺชนา – อสํวโร ภนฺเต วิปตฺติฯ

ปุจฺฉา – กา อาวุโส สมฺปตฺติฯ

วิสฺสชฺชนา – สํวโร ภนฺเต สมฺมตฺติฯ

ปุจฺฉา – กา อาวุโส ปฏิปตฺติฯ

วิสฺสชฺชนา – น เอวรูปํ กริสฺสามีติ ยาวชีวํ อาปาณโกฏิกํ สมาทาย สิกฺขติ สิกฺขาปเทสุ, อยํ ภนฺเต ปฏิปตฺติฯ

ปุจฺฉา – กติ อาวุโส อตฺถวเส ปฏิจฺจ ภควตา ปฐมํ ปาราชิกํ ปญฺญตฺตํฯ

วิสฺสชฺชนา – ทส ภนฺเต อตฺถวเส ปฏิจฺจ ภควตา ปฐมํ ปาราชิกํ ปญฺญตฺตํ, 1 - สงฺฆสุฏฺฐุตาย, 2 - สงฺฆผาสุตาย, 3 - ทุมฺมงฺกูนํ ปุคฺคลานํ นิคฺคหาย, 4 - เปสลานํ ภิกฺขูนํ ผาสุวิหาราย, 5 - ทิฏฺฐธมฺมิกานํ อาสวานํ สํวราย, 6 - สมฺปรายิกานํ อาสวานํ ปฏิฆาตาย, 7 - อปฺปสนฺนานํ ปสาทาย, 8 - ปสนฺนานํ ภิยฺโยภาวาย, 9 - สทฺธมฺมฏฺฐิติยา, 10 - วินยานุคฺคหายฯ

ปุจฺฉา – เก อาวุโส สิกฺขนฺติฯ

วิสฺสชฺชนา – เสกฺขาจ ภนฺเต ปุถุชฺชนกลฺยาณกาจ สิกฺขนฺติฯ

ปุจฺฉา – เก อาวุโส สิกฺขิตสิกฺขาฯ

วิสฺสชฺชนา – อรหนฺโต ภนฺเต สิกฺขิตสิกฺขาฯ

ปุจฺฉา – กตฺถ อาวุโส ฐิตํฯ

วิสฺสชฺชนา – สิกฺขากาเมสุ ภนฺเต ฐิตํฯ

ปุจฺฉา – เก อาวุโส ธาเรนฺติฯ

วิสฺสชฺชนา – เยสํ ภนฺเต วตฺตติ เต ธาเรนฺติฯ

ปุจฺฉา – กสฺส อาวุโส วจนํฯ

วิสฺสชฺชนา – ภควโต ภนฺเต วจนํ อรหโต สมฺมาสมฺพุทฺธสฺสฯ

ปุจฺฉา – เกนาวุโส อาภตํฯ

วิสฺสชฺชนา – ปรมฺปราย ภนฺเต อาภตํฯ

สํคายนตฺถาย สงฺฆสฺส ญาปนํ

สุณาตุ เม ภนฺเต สงฺโฆ อหํ ภนฺเต อายสฺมนฺตํ วิจิตฺถสาราภิวํสํ ติปิฏกธร ธมฺมภณฺฑาคาริกํ ปฐมสฺส ปาราชิกสฺส นิทานมฺปิ ปุจฺฉิํ, ปุคฺคลมฺปิ ปุจฺฉิํ, วตฺถุมฺปิ ปุจฺฉิํ, ปญฺญตฺติ อนุปญฺญตฺติอาทีนิปิ ปุจฺฉิํ, ปุฏฺโฐ ปุฏฺโฐจ โส อายสฺมาวิจิตฺตสาราภิวํโส วิสฺสชฺเชสิ, อิติหิทํ ภนฺเต ปฐมํ ปาราชิก สิกฺขาปทํ นิมฺมลํ สุปริสุทฺธํ ตสฺเสว ภควโต วจนํ อรหโต สมฺมาสมฺพุทฺธสฺส, ตสฺมา ยถาปุเร มหากสฺสปาทโย มหาเถรวรา โปราณสํคีติการา พฺรหฺมจริย สงฺขาตสฺส พุทฺธสาสนสฺส จิรฏฺฐิติยา พหุชนหิตาย พหุชนสุขาย โลกานุกมฺปาย อตฺถาย หิตาย สุขาย เทวมนุสฺสานํ ธมฺมวินยํ สงฺคายิํสุเจว อนุสงฺคายิํสุจ, เอวเมว มยมฺปิ ทานิ สพฺเพว ฉฏฺฐสํคีติมหาธมฺมสภาปริยาปนฺนา อิทํ ปฐม ปาราชิก สิกฺขาปทํ เอกโตสชฺฌายนวเสน สํคาเยยฺยามฯ

เรวตาภิ ปณฺฑิตธช สาสนวํส มหาธมฺมราชคุรุโน

อภิธชมหารฏฺฐคุรุโนจ สงฺฆนายก มหาเถรสฺส

โอกาส ทานกถา

สุณาตุ เม ภนฺเต สงฺโฆ, มหตี อยํ ปริสา, เอวรูปาย ปริสาย น สุกรา สพฺพโส กถํ สาเวตุํ, ตสฺมา อายสฺมโตจ โสภนสฺส สาสนริ สารามาธิวาสิโน อายสฺมโตจ วิจิตฺตสาราภิวํสสฺส ติปิฏกธร ธมฺมภณฺฑาคาริกสฺส วินยปุจฺฉนภารญฺจ วินยวิสฺสชฺชนภารญฺจ อาวหิตุํ โอกาสํ ทมฺมิ, กโรถ ตุมฺเห อาวุโส ฉฏฺฐสํคีติปุพฺพงฺคมานิ วินยปุจฺฉน วินยวิสฺสชฺชน กิจฺจานิ ยถาธมฺมํ ยถาวินยํฯ

อคฺคมหาปณฺฑิต ภทนฺต โสภนตฺเถเรน

ฐปิตา ปุจฺฉก สมฺมุติ ญาตฺติ

สุณาตุ เม ภนฺเต สงฺโฆ, ยทิ สงฺฆสฺส ปตฺตกลฺลํ, อหํ อายสฺมนฺตํ วิจิตฺตสาราภิวํสํ ติปิฏกธร ธมฺมภณฺฑาคาริกํ วินยํ ปุจฺเฉยฺยํฯ

ติปิฏกธร ธมฺมภณฺฑาคาริก

ภทนฺตวิจิตฺตสาราภิวํเสน

ฐปิตา วิสฺสชฺชก สมฺมุติ ญาตฺติ